Lilipad ang mga bato

Bakit ka magugulat
kung may handang makipagpatayan
para ipaglaban
ang gigibain niyang tahanan?

Bakit mo ipagtataka
kung makita mo mang
nagliliparan ang mga bato
patungo sa direksyon
ng mga berdugo
na ang pakay ay
manira ng pinagsikapang
ipundar na kinabukasan?

Bakit mo kamumuhian
ang mga namukol
ng bato, nanirador,
nag-alimura;
samantalang,
sa kabilang panig ay
umaalingawngaw ang
putok ng mga baril,
nanggagaling ang alingasaw
ng nakasusulasok na teargas,
at nagmumula ang lagaslas ng
malakas na bomba ng
tubig imburnal?

Bakit mo tatawaging ‘tarantado’
at ‘hampas lupa’
ang mga sinasabi mong ‘iskwater’
habang tahimik ka naman
sa malaking negosyanteng si Henry Sy
na walang gatol kung magpalayas
sa libo-libong pamilya
para lamang magtayo
ng magarang condominium
sa lupang kinatitirikan
ng kanilang mga bahay?

Bakit mo tatawaging mga ‘bobo, ‘tanga’
at ‘nagpapasulsol sa mga taga-labas’
ang mga sinasabi mong ‘iskwater’
na para bang kabobohan o katangahan
kung di man ay nabubuyo lamang ng sulsol,
ang mga tao na magtatanggol sa tahanan
ng kaniyang pamilya?

Bakit hindi ka man lamang
kinilabutan nang may mabuwal
mula sa hanay ng
mga residenteng lumalaban?
Kesyo ba may ‘demolition order’
naman mula sa korte
ang mga pulis na namaril
at sampid lamang sa lupa
ang namatay?

Bakit hindi ka mangilabot
sa gubyernong handang
manggiba ng tahanan ng mga Pilipino,
habang ibinabahay naman
ang mga armadong tropang ‘Kano
sa ating bayan;
labag man ito sa ating Konstitusyon,
sampal man ito sa ating
pambansang integridad at soberanya;
banta man ito sa puri ng ating mga kababaihan?

Bakit hindi ka mangilabot
kay Henry Sy
na walang pakundangan kung
huthutan ng tubo
ang libo-libo niyang mga
kontraktwal na manggagawa
sa kaniyang emperyo
ng malls at supermarkets;
si Henry Sy na walang takot
kung mamutol ng halos
dalawang daang mga puno
para lamang magtayo ng
paradahan ng sasakyan
sa isa niya pang mall?

Bakit ka magtataka
kung may aping nagbabangon
para ipagtanggol ang kanilang karapatan,
buhay man ay i-alay?

Huwag kang magtaka…
Hindi ka dapat magtaka,
dahil hangga’t may uring nagsasamantala,
hindi matatapos ang
paglipad ng bato
sa mga Silverio Compound
sa ating mundo.

Tiyak ang pagbabangon ng mga api,
para durugin ang mga gaya ni Henry Sy!

Photo from Tudla Productions

 

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s